Roretta Princess كلاسيك نشيط
عدد الرسائل : 100 تاريخ التسجيل : 25/05/2008
| موضوع: تخيلوا الشباب مكان البنات [ خطيييرة ] الأحد أغسطس 03, 2008 11:43 am | |
| تخيلوا الشباب مكان البنات !!! لو البنات مكان الشباب شوفوا وش لون يخطبون ؟؟؟ ( للمصرقعين والمصرقعات .. الصبيان منهم والبنات .. اللي مصلع منكم واللي عندهم شعرات ) .
×××××××××× يعني تتفاجأ في يوم وأنت قاعد تقرأ كتاب رومانسي و مشغل أغنية رايقة و سرحان في حبيبة مجهولة إلا و أمك داخلة عليك و توها جاية من الاستراحة . تقولك : يا ولدي ودي أكلمك في موضوع . ترد أنت بكل خوف : خير يمه ؟؟؟ تقول أمك : ترى جارتنا أم خالد تبي تخطبك لبنتها وأنت ما شاء الله كبرت و احلويت وكلن يبيك ها وش رأيك ؟؟؟ ثم تنزل أنت راسك في الأرض و تلعب بإصبعك في شعرك ( أو شنبك ) و ترد و أنت مستحي و خدودك حمرة ( هذا إذا كنت محلق اللحية ) . تقول : الشور شورك يا يمه إهئ إهئ >> ضحكة خجل . تقول أمك : أنا بصراحة ما أشوف في البنت شي ما شاء الله عليها محترمة و وظيفتها زينه و راتبها ممتاز و من عايلة محترمة و من البيت للمسجد و من المسجد للبيت ولا عندها سوالف السفر و الخربطة و ما تشرب خمر و لا تروح لاستراحات البنات يعني بنت ما عليها . تقول أنت : بس يا يمه هي ما شافتني من أول أنا دايما متلثم بشماغي . تقول أمك : هي شافتك و أنت نازل من باص المدرسة بس و سألت عنك و قالوا لها خوش ولد ماهوب راعي سوق و كوفي شوب و ما يطلع إلا مع أبوه و تراها هي و أمها جاين يوم الخميس عشان يشوفونك . تسال أنت : أوكي يمه أبوي شرايه ؟؟ تقول أمك : أبوك ما يدري خليه حايس في المطبخ يحضر عشا . تقول أنت : اللي تشوفينه يمه .
وتطلع أمك من الغرفة وتنط أنت قدام المراية و تأخذ نص لفة يمين و نص لفة شمال تشوف جسمك و تمشط شعرك و شنبك بدلع . تقول : آه أخيرا حست و خطبتني .
و قبل يوم الخميس تروح أنت لكوافير رجالي و تكون مسوي حجز و تقعد و تصبغ شعرك و تشيل شعر يدك و رجلك بحلاوة و تطلع زي فلقة القمر وتجي البيت و تلبس الثوب اللي فصلته عند المصمم ( عبده شولق ) لثياب الأعراس و الحفلات واللي فيه فتحة من عند الساق و فتحه في الظهر و بدون أكمام و ذاك الماكياج وذاك العطر و تنزل للصالة .
ويقولك أبوك : يا لله دخل العصير على خطيبتك ترى أمك ذبحتنا تسال عنك . تقول أنت بكل خجل : وآي وآي يا يبه أنا استحي . أبوك يقولك وهو يطق على كتفك و يضحك : يا ولد روح لعروستك . تقول أنت: يا يبه دايما تحرجني أنت وآي وآي .
و تأخذ صينية العصير و تخش المجلس اللي فيه البنت . تقول بصوت ناعم : احم احم السـ .. سسسلام عليكم (صاير حكيم على غفلة ) . ترد هي بعد ما وقفت : و عليكم السلام . و هي تناظر فيك و في كل قطعة فيك . و تقول لها أنت : تفضلي . تقول هي : وش الأحلى العصير الأحمر و لا الأصفر ؟؟؟ ( بزعمها تبي تلطف الجو معك ) . تقول أنت : كله حلو . تقول هي : أكيد كله حلو لأنك أنت اللي مسويه .
ثم تحط الصينية بسرعة و يدك على فمك و تضحك و تروح داخل بسرعة إلا إخوانك يستنونك . يقولون : ها وش لون شكلها ؟؟؟ تقول أنت : وآي وآي تهبل تهبل حلوة و دمها خفيف و ذوق هههههه . إلا أبوك من المطبخ ( يزغرط بالمصري ) : لللللللوووولللللوووووشششششششش مبروك يا ولدي . إلا بدخلة أختك العربجية من بره و حاطه عبايتها على كتفها و معلقة السيجارة في فمها . تقول : خير وش فيه ؟؟؟ يقوله أبوك : قصري صوتك في وحده داخل خطبت أخوك . تقول أختك : وهي وين شافت اخوي عشان تخطبه هاه ؟؟؟ و تعطيك كف و تصرخ : والله لألعنها اللي جايه تخطب اخوي . إلا بدخلة أمك و تضرب أختك كف و تطلع أختك بالسيارة و تشفط و تروح للاستراحة البنات .
و تمر الأيام و أنت تجهز ثوب العرس و الكوشة و بيت الزوجية و خلال هالفترة تمرك زوجتك بالسيارة تتمشون و تحاول إنها تمسك أيدك و أنت مستحي و يجي يوم العرس و تقعد أنت في الكوشة و كل الشباب حوالينك يرقصون و يغنون على أنغام طيران فرقة الشاطئ للرجال . وشوي إلا العفسة قايمة : ترى العروس جايه . و ينطون الرجال و الشباب كلن يلبس شماغه و يتلثم و تدخل العروس مع أمها و أخواتها ( أخواتها يتميلحون قدام الشباب ) و تقعد العروس جنبك و ترفع الطرحة ( طرحة البسام بصمة خمسة ) . و تقولك : الله صاير مثل القمر .
ثم تلف وجهك وأنت مستحي و يتم الزواج و بعد تسعة شهور إلا أنت تصرخ في الليل فيك الطلق و يودونك المستشفى و تولد و تجيب توأم وتطلع من المستشفى إلى بيت اهلك عشان ينفسك أبوك ( النفاس 40 يوم ) و تأخذها زوجتك فرصة و تسافر مع البنات و يهيصون قبل ما تخلص مدة نفاسك الله يساعدك و ترجع لبيتك تربي عيالك و تطبخ الغدا لزوجتك وتتخانقون ساعات و تنام و دمعتك على شنبك ويزيد حدة الخلاف و تأخذ شماغك و عيالك و تروح لبيت اهلك و تصلح أمك ما بينكم و ترجع الحياة مثل أول .
×××××××××× ها وش رأيكم في تبادل الأدوار ؟؟؟ والله جد تخيلوا كذا الحياة أحسها بتكون مو شيء !!! تحياتي البرنسيسة RORO RORETTA | |
|